منى زكي: السوشيال ميديا عالم كاذب ووفاة والدي نقطة تحول في حياتي

حلت الفنانة منى زكي ضيفة إيناس سلامة الشواف في برنامجها طريق ثالث على راديو إنرجي ٩٢.١.

وقالت منى زكي أن هناك الكثير من الأشخاص الإيجابية التي تضيف للشخص وهناك أشخاص العكس يقدمون غل وشكوى.

وعن الشخصيات الإيجابية في حياتها قالت: "الأشخاص الإيجابين كانوا كتير منهم عيلتي وخاصة والدي وخالتي كان ليهم أثر كبير وخدوني في مناطق احلى كتيرة غيرت في حياتي".

وتابعت:"بابا كان متسامح وحنين جدا فأخذني في الحتة دي حتة الحنية والعطاء، خالتي ادتني حكمة لإنها كانت شخص محب للحياة بشكل كبير  وحاولت اتعلم منها"، واضافت: " في المقابل كان في ناس تأخدك في طريق سيء ومش حلو زي ياخدوك في سكة النميمة السيئة".

وعن الشخصيات التي أثرت بها خلال رحلة الدراسة قالت: "كان عندي مدرسة ومدرس خلوني احب الانجليزي جدا بس كان في مدرسين كرهوني في الحساب والرياضة حتي اللحظة".

وأكملت: "في شخصيات تاريخية في مصر القديمة أثرت فيا وتستحق الوقوف امامها ودراستها، من الشخصيات المهمة أيضا العالمة سميرة موسى فهي شخصية تستحق نتكلم عنها ونتعلم منها".

وعن شخصيات درامية من النجوم أثروا فيها قالت: " وانا صغيرة كان في شخصيات كتيرة فنية اثرت فيا زي سعاد حسني، فاتن حمامة، سناء جميل، احمد زكي وغيرهم الكتير بلدنا مليانة بمواهب وعلماء ".

وعن الأدوار التي قدمتها واثرت فيها قالت: "في ادوار كتيرة اثرت فيا زي فيلم السادات وشخصية جيهان السادات اثرت عليا جدا، شخصية سعاد حسني في المسلسل  الذي تناول قصة حياتها غيرتني جدا واثرت فيا انا كنت بتكسف اني انثي بس الدور ده خلاني اتخطي الموضوع، وكذلك فيلم أحكي ياشهرزاد والشخصيات المختلفة به اثرت فيا وكذلك  مسلسل نيوتن  وافراح القبة"، وقالت: "في  ادوار بتاثر فيكي وبتغير فيكي ده".

واكملت حديثها: "ولادنا ليهم تاثير كبير علينا، بس التجربة بتقول انك انتي بتربي نفسك علشان خاطر ولادك يعني  بتخافي تكوني شخصية وحشة قدامهم وعلشانهم مثلا بطلت اكون عصبية ".

وقالت: "المرض والموت بيكونوا نقطة تحول في حياة الكثير، أنا موت ابويا كان نقطة تحول كبيرة في حياتي  و ان كل حاجة في ثانية بتروح علمتني حاجات كتيرة".

قالت: مش عايزة أكون قدوة لحد

وعن السوشيال قالت: "ان بكره السوشيال ميديا وتعاملي قليل ومش بقرأ فيها كتير بس بحب الجزء الانساني والخفيف عليها وأنا مش بقول كده علشان اتهاجمت مؤخرا بس أنا من فترة وأنا بقول إني بكره التريند".

وتابعت: "السوشيال ميديا هي عالم افتراضي كاذب سواء بنجاحه او فشله،  العالم ده كذب في كذب أنا  مقتنعة ان عالم السوشيال ميديا عالم تجاري كبير وفيه عصابات، انا بقول ان السوشيال ميديا هو العالم السفلي الجديد".

وختمت حديثها: "أنا مش عايزة اكون قدوة لحد انا عايزة الناس تفتكرني اني ماذتش حد في حياتي".