عمرو سلامة يطالب باتخاذ الإجراءات اللازمة ضد المزعجين في السينمات: تحولت لكابوس
أعرب المخرج عمرو سلامة عن استيائه الشديد لما يحدث داخل صالات العرض السينمائي، وطالب أن يكون هناك اتخاذ الإجراءات اللازمة ضد المزعجين في صالات العرض، بسبب عدم احترام بعض الحاضرين للمشاهد.
وكتب عمرو سلامة في منشور عبر حسابه الرسمي بموقع فيسبوك: «تجربة دخول السينما أصبحت ساعات بتتحول لكابوس، في ظاهرة قذرة بتزيد بشكل واضح».
الصوت العالي داخل السينما
وتابع: عدد من الناس اللي في قاعة السينما اللي عندهم قلة ذوق وقلة أدب وكلاحة وبجاحة إنهم مش محترمين باقي القاعة ومستعدين يتكلموا ويهرجوا بصوت عالي أو عادي جدًا يردوا على التليفون أو يفتحوه ويلعبوا ألعاب على الموبايل ونوره يضايق اللي حوليهم والأقذر تلاقيه حاطط جزمته فوق دماغك كإنه قاعد في زريبة.
وواصل: أنا زهقت من إحساس مشرف الرحلة اللي قاعد يقول للشاب ده الصوت بعد إذنك حضرتك، وللأستاذة دي النور بعد إذنك جنابك وللحاجة دي التليفون بعد إذن سعادتك وللشابة دي ماتشلتيش في ظهر الكرسي بتاعي بعد إذن فخامتك.
كما أضاف: امتى بقى في إنعدام للإحساس والإدراك إنك بتضايق واحد جنبك وبتعكنن عليه وتبوظ تجربته اللي دافع فيها فلوس؟ والسؤال الأهم، ليه إنت دافع فلوس في دخول السينما وإنت مش مهتم تشوف الفيلم؟ ما تنزل تقعد في كافيه أو قهوة أو مطعم أو وفر فلوسك وأقعد في الليڤنج وأفتح فيلم بقى والعب على الموبايل براحتك واعمل تليفوناتك وهرج مع صحابك وعلى صوتك وجعر براحتك.
مطالبات بإدارة السينمات بكل حزم
واختتم: «لازم على إدارة السينمات تتعامل مع الموضوع ده بحزم أكثر وتاخد إجراءات مع كل المزعجين وتطلب منهم تسيب السينما، لأن ناس كثير بقت مش عايزة تروح السينما لأنها مش هتعرف تتفرج وتتفاعل مع الفيلم، وده معناه حتميا إيرادات أقل وخسائر للسينمات نفسها، وللمزعجين أرحمونا يرحمكم الله، وعلى كل متضرر مايسكتش وياخد حقه وياخد موقف مع إدارة السينمات لحد ما نعرف نخش فيلم ونعرف فعلا نتفرج عليه».