السيسي يفتتح مشروعات في كفر الشيخ ويعلق على «سد النهضة»: اطمّنوا يا مصريين

قدّم الرئيس عبدالفتاح السيسي، الشكر لكل القائمين على مشروع «بركة غليون» وباقي المشروعات القومية، قائلا: «بوجه كلامي لكل المصريين اللي انتم شايفينه واللي هانتكلم فيه خلال الفترة المقبلة خطوة على طريق، ده مش كل الطريق ولا ده هو المستهدف ولا ده الأمل».
وأضاف الرئيس السيسي في كلمته خلال افتتاح عدد من المشروعات التنموية، بمحافظة كفر الشيخ، قائلا: «المشوار اللي قدامنا طويل ومتأخرين فيه كتير، لأسباب كتير، ومحتاجين نتحرك بوعي وهمة وإخلاص وأمانة أكتر من كده بكتير»، وقال الرئيس تعليقا على أزمة سد النهضة، قائلا: «مية مصر موضوع مافيش فيه كلام، وأنا بطمنكوا ماحدش يقدر يمس مية مصر».
وتابع: «اتكلمنا مع أشقائنا في أثيوبيا والسودان على 3 عناصر، منها عنصر عدم المساس بالمياه، وبنقول إن إحنا متفهمين للتنمية، لكن قدام التنمية دي مية حياة أو موت لشعب، وميه ربنا اللي خلقها ما حدش تاني عملها، بقالها آلاف السنين أنا عاوز اطمنكوا، وانتوا بتقولوا إن المساس بالمية خطر، طيب ما اللي زرع زراعة أرز أزيد من المطلوب ده تجاوز في حق مية مصر وصالح شعب مصر».
وقال الرئيس السيسي: «تحدثت منذ عامين وأكثر وقلت أننا بحاجة للتحرك كدولة بشكل موازى مع آليات السوق الحرة الموجودة في مصر، لتخفيف ما أمكن من التكلفة التي يتحملها المصريين، وخاصة محدودي الدخل».
وأضاف: «مشروع الاستزراع السمكي سينتج 25 ألف طن، لكن اللي بيتعمل فيه حاجات متكاملة مع بعضها وليس على قدر المزرعة دي فقط، فقد افتتحنا أكثر من ألف حوض على الضفة الشرقية لقناة السويس، وفى المرحلة الثانية بهذه المنطقة سنستكمل 4 آلاف حوض أسماك، وفي ديسمبر المقبل سنفتح هذه الأحواض، وبالتالي في شرق قناة السويس سنكون انتهينا من 4 آلاف حوض إضافي، كما نعمل على إنشاء مزرعة عملاقة شرق بورسعيد على 19 ألف فدان، وإحنا مش بتكلم عن أي مشروع لم يتم افتتاحه، لكننا انهينا حجم ضخم من هذه المزرعة، ووعدتكم في 30 ويونيو 2018 لازم أكون خلصت اللي وعدتكم بيه ومنها مزرعة شرق بورسعيد وبركة غليون ومزارع هيئة قناة السويس، بالإضافة للبحيرات ».
وأوضح ـن هناك فجوة موجودة وقدرات أهدرت وساءت مننا على مدار السنوات الماضية، فمثلاً بحيرة المنزلة من عدة بحيرات موجودة في مصر وعبارة عن بحيرات مغلقة لإنتاج الأسماك إنتاج طبيعي، ولكن الصيد الجائر والتعدي على هذه البحيرات وإلقاء مخلفات الصرف الصحي والصناعي والزراعي عليها أدى لأن فقدنا القدرة الحقيقية على الاستفادة من هذه المزارع.
ورد الرئيس عبد الفتاح السيسي، على مناشدة أحد المواطنين حول ملف غرامات الفلاحين والمزارعين، قائلاً: “الفلاحين والمزارعين أهلي وناسي، بس لازم تعرفوا أن الأوطان لا تبنى بالخواطر بل بالالتزام والانضباط».
وكان أحد الحضور قد ناشد الرئيس عبدالفتاح السيسي، بالعفو عن فلاحي كفر الشيخ من غرامات الري، وغرامات زراعة الأرز لهذا العام، بمناسبة المولد النبوي الشريف، قائلا: «أنت تعفو عن بعض المساكين من شبابنا».
وأضاف الرئيس: “انتوا تاخدوا مني الطيب والطيب لأني معنديش غير الطيب اديه ليكم.. بس انتوا بقالكم أسبوع بتتكلموا عن سد النهضة وبتقولوا المياه رايحه فين.. طيب هو إحنا ضد إن المزارع يزرع رز في مصر ولا ننظم حجم المياه المخصصة للزراعة عشان تكفينا».