عمرو أديب: متخافوش على السلام.. الإسرائيلي بينضرب على قفاه من كل العالم

أكد الإعلامي عمرو أديب، أن ما يحدث على الحدود المصرية مع قطاع غزة يعد مسألة أمن قومي، مشيرًا إلى أن الدولة أعلنت ذلك في أكثر من مناسبة.

وقال أديب خلال برنامج "الحكاية" المذاع على قناة "إم بي سي مصر": "متخافش على السلام أنت عندك اللي يحفظ سلامك وبعدين هي الحياة يا حرب يا سلم، أنت وقت ليبيا رحت ضربت لما حد هدد مصالحك، أنت بتستخدم قوتك العسكرية بالقدر اللي أنت عايزه".

وأضاف: "ولكن هذه الحالة واللي يقولك الجيش المصري، الجيش المصري أهو والخارجية المصرية أهيه والرئيس السيسي أهو متخافوش على السلام، هو لا يستطيع ولا يحاول أن يهز السلام معاه، والإسرائيلي في أضعف مراحله الآن بينضرب على أفاه من العالم كله".

وتابع: "كل اللي بطلبه يا جماعة أن إحنا محتاجين الفترة الجاية أن يكون واضح بالنسبالنا أن حدودنا مع غزة ليست مسألة بسيطة وليست مسألة فلسطينية ولكن مسألة مصر وهتظل مصرية ومش أنا اللي بقول هاتوا الكلام بتاع المصادر رفيعة المستوى اسمعوا كلام وزير الدفاع".

وأكمل: "التقرير بتاع السي إن إن برة كل الأصول وبرة كل الشغل، عمرك ما وصلت لاتفاق في المنطقة دي غير بالإدارة المصرية، أنا بقول جمدوا قلبكم يا جماعة دي بلد قوية دي بلد محدش يتعامل معاها كده".

وواصل: "مينفعش حد يتصرف على حدودك كده بمزاجه، وبعدين مبنتكلمش بلطجة مش في اتفاقية السلام من 1979 موجودة وبتحدد كل الكلام ده أنا مبقولش حاجة جديدة أنا بلخص اللي حصل الأسبوع اللي فات".

وواصل: "مصر النهاردة قررت تغلب الموقف الإنساني؛ والبيان المصري اللي بيقول، والكوبري اللي عملوه على البحر لا يسمن ولا يغني وكان بيعمله عشان عايز يستغني عنك".

وذكر: "أنت دلوقت واصل لمرحلة أنهم هيبعتوا وسطاء بين مصر وإسرائيل عشان مصر ترجع تقعد مع إسرائيل تاني هو من أول يوم عايز ينقلك من أنك جزء من الحل لأنك تبقى جزء من المشكلة، وهو الأسبوعين اللي فاتوا قرب من كده".

واختتم: "هذه هي حدودنا وهذا هو نفوذها وهذا هو تاريخنا وقدرنا ولازم نكمل كده، وكل اللي حكموا مصر من أيام الفراعنة لحد دلوقت الجبهة دي هي الأهم، بص على أي رئيس هو السؤال الإجباري الجبهة الشرقية من أيام أحمس والهكسوس".