الأحد 26 مايو 2024 الموافق 18 ذو القعدة 1445
رئيس التحرير
شيماء جلال
عاجل
أخبار

شاهد.. تامر أمين: "خسارة الأهلي درس لكولر.. مش أي 11 هترميهم يجيبوا المكسب"

الإعلامي تامر أمين
الإعلامي تامر أمين

هنأ الإعلامي تامر أمين، جماهير نادي الزمالك ومجلس إدارته بالفوز الذي حققه على النادي الأهلي بهدفين مقابل هدف، في المباراة التي أقيمت بين الفريقين مساء اليوم ضمن منافسات بطولة الدوري.

مبروك للزمالك

وقال أمين، خلال برنامج "آخر النهار" المذاع على قناة "النهار": "مليون مبروك للزملكاوية بجد، وأنتوا عارفين أنا أهلاوي حتى النخاع، وأكيد محبط ومش مبسوط، ولكن عندي 3 أسباب خلوني مش زعلان، وشايف إنها مفيدة جدًا، لإنها دروس آلهية لمن يتعلم".

وأضاف: "السبب الأول مجلس إدارة نادي الزمالك الجديد يستحق فرحة يستحق نصرة ويستحق دعمًا، مجلس إدارة نادي الزمالك الجديد وكلهم ناس محترمة بيبنوا البيت وبيرتبوا البيت من أول يوم، وكانت الدنيا مش مساعداهم أوي، مش بس في كرة القدم ولكن حتى على مستوى باقي الرياضات كان في سلسلة من الانتصارات الحمراء على الفرق الجماعية في نادي الزمالك، وطول الوقت مجلس إدارة نادي الزمالك الجديد مش باين".

وتابع: "أنا عارف الناس دي بتشتغل إزاي وبتحاول تعمل إيه في نادي الزمالك عشان يرجع قطبًا كبيرًا ومستقرًا، مجلس إدارة الزمالك كان يستحق الفرحة، اتنين رغم إني مش زملكاوي، ولكن بقول إن جمهور الزمالك صبر كتير على الفرحة دي، وكان يستحق أن فريقه ينصفه ولو مرة، هو صحيح المباراة دي مش مباراة بطولة وطبعًا الزملكاوية لو سالت أي واحد كان هيقولنا كان نفسنا نكسب نهائي الكأس اللي اتلعب الشهر اللي فات في السعودية لإنه في النهاية كان ديربي وفي السعودية، والعالم كله بيتفرج، وكمان الفوز بيه كان يمنحك بطولة مباشرة، ولكن مباراة اليوم مباراة في الدوري لا حسمت الترتيب ولا حسمت إفريقيا".

يستحقون الفرحة

وواصل: "جمهور الزمالك صبر كتير، وبالتالي يستحقوا هذه الفرحة، وعشان تصدقوني بصوا اللحظة اللي أعقبت إحراز سيف الجزيري الهدف التاني لنادي الزمالك، كله نزل وجري وكإن الماتش انتهى، وكأنهم خدوا كأس العالم، لأنهم استنوا كتير وصبروا كتير، تهنئة من القلب لجمهور نادي الزمالك".

واختتم: "السبب التالت اللي مخليني مقتنع إن الهزيمة واجبة ومفيدة ودرس هي للأخ كولر (السويسري مارسيل كولر، المدير الفني للفريق الأول لكرة القدم بالنادي الأهلي)، النهاردة درس يجب أن يتعلم منه كولر بشدة إنه مفيش تعالي في كرة القدم، ومفيش غرور ومفيش عناد، اه إحنا بنسمع فكرة الأهلي بمن حضر بس العناصر البشرية وإمكانياتها وتوظيفها أساسي في كرة القدم، ومفيش حاجة اسمها ارمي أي 11 في الملعب وهيجبولك المكسب، وخصوصًا لما تلاعب نادي كبير زي الزمالك، مباراة زي دي مينفعش المغامرة اللي عملتها في الشوط الأول، الأهلي النهاردة ابتدى الماتش مع بداية الشوط التاني".