مصطفى شعبان يكشف تأثير حريق ستوديو الأهرام على مسلسل "المعلم"
كشف الفنان مصطفى شعبان، عن تأثير حريق ديكور مسلسل المعلم والذي أقيم في ستوديو الأهرام على استكمال العمل الذي يعرض حاليا في شهر رمضان.
وقال شعبان خلال برنامج "حبر سري" المذاع على قناة "القاهرة والناس": "الحريق كان عامل لنا صدمة كبيرة أوي ولا يزال، إحنا كنا خلصنا وروحنا وكان فات ساعتين وبدأت المكالمة الأولى اللي جاتلي أن في حريق في الحارة، عندنا الحارة مبنية وبعدين ديكور الشادر وبعدين خلصت على الشادر وبعدين دخلت على العمارات اللي جنبنا".
وأضاف: "الحمد لله إن محدش حصل له حاجة والخسائر مادية ولكن الموضوع دة أثر جدا والواحد كان شايف 3 -4 عمارات اتحولت خالص والناس حالتهم اتأثرت بيها جدا وحصل جوانا لخبطة طيب أحنا نعمل ايه ونكمل فين وكان لسه فاضل لنا أيام، عملنا جلسات عمل كبيرة ومكثفة مع المؤلف والمنتج والمخرج وقدرنا نعمل تغييرات في المواقع ولكن مغيرناش في السيناريو".
وعما تردد حول تشابه مسلسل المعلم مع فيلم شادر السمك والذي قام ببطولته الفنان الراحل أحمد زكي: "المقارنات دي شوفتها قبل رمضان وأنا مش عارف لسه بتكلم في إيه، مش أي حد يعمل سمكة يبقي ليه علاقة بشادر السمك، من فيلم شادر السمك لغاية المعلم مفيش عمل لا سينمائي ولا درامي ناقش موضوع سوق السمك خالص".
وتابع: "شادر السمك كان من الثمانينيات، لما نتفرج بقي محدش يتكلم ويقول إن ليه علاقة واللي يجمعه أن ده شادر سمك ودا شادر سمك، وحتى لو حد أخد قصة المعلم وعملها تاني السنة الجاية إيه المشكلة المهم أنه عملها إزاي".
وواصل: "الترويج للمسلسل ممكن يخدم أول حلقتين ولكن هيكمل المشاهد وإلا لا لازم العمل نفسه يكون فيه عنصر التشويق، الدعاية مهما كانت هتخليني أشوف أول حلقة وتاني حلقة وتالت حلقة لو النجم أو النجمة بحبهم، إحنا بدأنا المسلسل وفكرنا فيه وكتبناه، المؤلف حط الفكرة في شهر يونيو اللي فات".
ويقوم ببطولة مسلسل المعلم كلا من مصطفى شعبان، سهر الصايغ، أحمد بدير، عبد العزيز مخيون، انتصار، منذر رياحنة، سلوى خطاب، محمود الليثي، أحمد فؤاد سليم.
