ميدو: عمرو أديب ممكن يطلع أهلاوي.. والزمالك بالنسباله مادة حلوة

أكد أحمد حسام ميدو، نجم الزمالك السابق، أن الإعلامي عمرو أديب ربما لا يكون مشجعا لنادي الزمالك كما يدعي.

وقال ميدو خلال برنامج "أسرار" المذاع على قناة "النهار": "عمرو أديب زملكاوي كبير ولكن في حاجة بتجنني؛ الجول بتاع أيمن منصور في ماتش السوبر في جوهانسبرج عام 1994 كان عمرو أديب في المدرجات ومكانش فرحان؛ ولو جبتوا اللقطة دي هو مكانش يعرف أن الكاميرا عليه".

وأضاف: "أنا خايف بعد كل ده يطلع أهلاوي؛ وخلي بالك يعملها؛ لأن الزمالك بالنسباله مادة حلوة في الميديا ويعمل أي حاجة عشان ينجح البرنامج ممكن كل ده خطة؛ أنا مش عارف".

وتابع: "الزمالك هو نادي القرن طبعا وأكتر نادي فاز ببطولات قارية في القرن الماضي هو نادي الزمالك؛ الأهلي دلوقت واخد بطولات أكثر من الزمالك بكتير ولكن الزمالك لغاية سنة 2000 كان الأكثر بطولات".

وواصل: "عمرو أديب موقفش جنبي في أزمتي مع مرتضى منصور وقبلها كان هو ومرتضى في قضايا مع بعض؛ واحنا الاتنين الموضوع جالنا في حته واحدة أنا كنت في خناقة وعمرو كان في نفس الخناقة؛ عمرو أديب رجل جامد في الإعلام والحلقة اللي طلعتها معاه كانت أكبر نسبة مشاهدة في تاريخ الاعلام".

وأكمل: "عملنا الحلقة حلوة أوي؛ وكان مرتضى مقعد 40 محامي بيكتبوله أي خطأ عشان يرفعوا علينا قضية وكانت حلقة مفيهاش هزار".

وذكر: "أنا والمستشار مرتضى منصور اتصالحنا مع بعض ومش هنفضل متخانقين مع بعض طول العمر يعني؛ أنا مكنتش ناوي اصالحة لأنه قال عليا كلام وحش وانا اخدت حقي وهو في الاخر راجل أكبر مني في السن وأبو أصحابي ومش عيب نتصالح ولكن متقللش مني".

واختتم: "اللي حصل أنه شيكابالا منه لله كان عمل غلطة كبيرة جدا وكانوا هيمشوه من الزمالك ومن غير ما أقول لحد عديت على شيكابالا وخدته على بيت مرتضى ودخلت وهو ميعرفش أني رايح له؛ دخلت قلتله مساء الخير يا سيادة المستشار؛ قالي أنت بتجبلي بلطجي هنا وقلتله يا شيكابالا اعتذر لسيادة المستشار وهو اعتذر له ونزل الملعب".