تامر أمين يبرز تصريحات وزير إسرائيلي: "أول مرة صهيوني يبقى عنده حق"

أكد الإعلامي تامر أمين؛ أن إسرائيل سوف تتعرض لضغوط دولية هائلة بعد انتهاء الحرب الحالية في قطاع غزة من أجل إقامة دولة فلسطينية مستقلة.

وقال أمين خلال برنامج "أخر النهار" المذاع على قناة "النهار": "الناس كلها بتفكر في الهدنة واتمام الهدنة؛ السؤال الأهم ماذا بعد الهدنة وصفقة الاسرى؛ عايز اكلمكم عن محورين؛ الداخل الإسرائيلي أو الداخل الصهيوني؛ في تبادل الاسرى هيطلع 50 اسير إسرائيلي طلوع الـ 50 أسير هيضغط على إسرائيل أكتر ما هيفرحهم".

وأضاف: "الـ 50 اللي هيرجعوا هيفرحوا 50 عيلة إسرائيلية وبقيت الـ 200 عائلاتهم عاملة ازاي ووضعهم عامل ازاي وهما شايفين أسر بتفرح وهما لا؛ بقيت العائلات هيمثلوا ضغط شديد جدا على نتنياهو أكثر من فرحة العائلات التي عادة اسراها".

وتابع: "إسرائيل عارفة كويس أوي أن اللحظة اللي هيتوقف فيها إطلاق النار مش بس نتنياهو هيتعرض لمسائلات وربما عزل من الحكومة بسبب الفشل الاستخباراتي والعسكري ولكن كما بسبب الهجوم الدولي عليه على فكرة جرائم الحرب".

وواصل: "هما عارفين أن هيتفتح عليهم طاقة جهتم؛ هما عارفين أيضا أنه في اللحظة اللي هتنتهي فيها العملية العسكرية العالم كله مش هيكون قدامه غير مطلب واحد ألا وهو حل الدولتين؛ خلاص العملية العسكرية خلصت واسراكم رجعوا طيب مش هنقعد في اللعبة دي كتير لازم نحل حل الدولتين أو حل فلسطين وإسرائيل".

وأوضح: "الصهاينة في بعضهم بيفهم وبعضهم لماح بعضهم ده وزير العلوم الإسرائيلي اللي قال النهاردة بعد انتهاء الحرب ستتعرض إسرائيل لضغوط دولية هائلة من أجل إقامة دولة فلسطينية والحقيقة للأسف يعني أول مرة أقول إن في واحد صهيوني عنده حق؛ هيحصل وبشدة لأن الان مفيش بديل".

وأكمل: "الفايدة الأساسية من الحرب أو العدوان الإسرائيلي اللي حصل طبعا فاتورته فادحة ولكن في النهاية عزائنا أن الشهداء في الجنة وأن التمن هتكون نتيجته إقامة الدولة الفلسطينية؛ ولكن نتيجته الأساسية أن العالم كله تعمق وغرز في القضية الفلسطينية والناس اللي مكانتش فاهمة فهمت وقربت وقالت احنا فعلا ساكتين على الاحتلال وعلى شعب يباد وكل الكلام ده ظهر للعالم الغربي شعوبا وحكومات".

واختتم: "أصبح واضح وضوح الشمس حتى المتحيز هيبقي متحيز على استحياء أنت بتحيد الظالمين ومبتخليهمش يقدروا يتحيزوا ببجاحة"،