عمرو أديب يوجه رسالة إلى محمد صلاح: "تحدث حتى نراك"
وجه الإعلامي عمرو أديب؛ رسالة إلى محمد صلاح نجم ليفربول الإنجليزي، مطالبا إياه باتخاذ موقف مناسب تجاه الأحداث الجارية في قطاع غزة، خاصة أن كثير من الشباب ينتظرون موقفه.
وقال أديب خلال برنامج "الحكاية" المذاع على قناة "أم بي سي مصر": "رسالة إلى محمد صلاح؛ الكبير الناس بتتوقع منه فعل كبير؛ أنا عارف أنك ممكن تكون مضايق دلوقت؛ الناس كلها شيفاك يا محمد أن أنت فخر العرب وفخر العرب مش لازم يتخلى عن العرب وهما محتاجينه؛ أنا عارف مشاعرك وعارف قد إيه أنت إنسان محترم وأنت جواك مشاعر نبيلة جدا تجاه إخواننا الفلسطينيين".
وأضاف: "قد يكون هناك سياسة ما جوة النادي أن مفيش لاعيب يعبر عن نفسه بشكل سياسي وقد يكون في حسابات من الناس اللي حواليك؛ محمد أنت محدش يقدر يعملك مشكلة أنت قوي وموهوب ومحبوب ومحدش هيزعل أبدأ أنك واقف جنب أهلك ودينك".
وتابع: "محمد بيجي مواقف في الحياة الواحد بيتحط في اختيار وأنت دلوقت قدام الاختيار والوقت معداش أنت تأتي متأخرا خير من ألا تأتي أبدا؛ أنت كلمتك جوة المجتمع اللي أنت فيه بألف وعايز أطمنك لحاجة أنه إلى حد ما لو تقارن الإعلام الإنجليزي بأي إعلام آخر في أوروبا إلى حد ما في قدر من التوازن".
وواصل: "يعني اللي يتفرج على بي بي سي يرى أن هناك بعض التوازن؛ فأنت في مجتمع يا محمد فيه عدد كبير من العرب وعدد كبير من المسلمين؛ حد يقولي هو محمد صلاح هو اللي هيوقف الضرب على غزة؛ لا مش محمد صلاح ولكن ينتظر الشباب اللي مثلهم الأعلى فخر العرب؛ محمد هذا هو وقت الكلام تحدث حتى نراك".
وأكمل: "أنا أعلم اللي جواك وأعلم أنك لن تتردد متخافش يا محمد كلنا جنبك ومعاك وموهبتك وقدرتك هتخليك تقدر تعبر هذا الأمر احنا مستنينك وعايز أقول للناس اللي بتهاجم محمد صلاح بشويش شوية مهو في أندية مفتحتش بقها كتير فيعني بشويش على صلاح وأنا واثق أن صلاح ربنا هيهديه للقرار الصحيح فعلا".
