عمرو أديب يعلق على تخطبط المعارضة: "في غيرة من واحد مش بالعينه"
عبر الإعلامي عمرو أديب، عن دهشته بسبب الانقسام الشديد الذي تشهده الحركة المدنية تجاه الانتخابات الرئاسية المقبلة.
وقال أديب خلال برنامج "الحكاية" المذاع على قناة "أم بي سي مصر": "الغريب يا سادة أن الحركة المدنية امبارح اجتمعوا وطلعوا بيان غريب جدا وقالوا حاجة غريبة جدا؛ انتوا اتفقتوا على اية ياجماعة؟ انتوا تلاتة أحمد الطنطاوي وجميلة إسماعيل وفريد زهران وقالوا وارد جدا أننا نتوافق على واحد ولكن احنا لم نتوافق على واحد بندي الفرصة للاتنين التانيين يكملوا أو ينسحبوا؛ طيب تبقوا عملتوا ايه هذا التخبط غير طبيعي وغير عادي".
وأضاف: "انتوا أحرار يا رب تبقوا عشرة ولكن الأحزاب برة بتعمل كدة؛ أما دول قرروا اية؟ زي ما قالوا لزينب بشنب ولا من غير شنب؟ قالت بين البينين".
وتابع: "أنا أسف أنا مبحرضش حضراتكم قررتوا ان دي انتخابات رئاسية أنا كل اللي هاممني أن يكون في معركة والوجوه الموجودة المرة دي أفضل كتير من اللي موجودة قبل كده؛ كانوا دايما يلوموا على الرئيس الموجود والنظام السياسي أن الناس عايزة تبقي لوحدها؛ طيب مانتوا نفس الحكاية محدش فيكم عايز يقوم عشان حد تاني
وواصل: "جوة المعارضة في غيرة من واحد أو مش بالعينه ولكن هل ده الموقف اللي كانوا يتحدثون عنه بمثالية شديدة؟ أنت داخل الانتخابات دي ليه؟ عشان تسجيل موقف قوي على الأقل لو مفيش الانتخابات دي يبقي اللي بعديها".
وأوضح: "انتوا ناويين تتناظروا مع بعض فانا يعجبني فريد زهران عن جميلة عن الطنطاوي؛ طيب وبعدين لما تخلصوا على بعض؟ انتوا مش عايزين ممارسة ديموقراطية وشيء قوي؟".
وأعلن ثلاثة من المعارضة المصريين ترشحهم للانتخابات الرئاسية المقبلة وهم النائب السابق أحمد الطنطاوي وجميلة إسماعيل رئيس حزب الدستور بالإضافة إلى فريد زهران رئيس الحزب المصري الديموقراطي الاجتماعي.
وكانت الهيئة الوطنية للانتخابات قد عقدت مؤتمرا صحفيا اليوم أعلنت خلاله التفاصيل الخاصة بانتخابات الرئاسة والتي ستعقد في ديسمبر المقبل.
ومن المقرر أن تقام الانتخابات بإشراف قضائي كامل ضمانا للنزاهة والشفافية قبل انتهاء المدة المقررة دستوريا بشأن انتهاء الإشراف القضائي.
