الإفراج عن الدكتور محمد زهران مؤسس تيار استقلال المعلمين

كشف الإعلامي عمرو أديب عن الإفراج عن الدكتور محمد زهران مؤسس تيار استقلال المعلمين والذي ألقى القبض عليه منذ أيام.

وقال أديب خلال برنامج "الحكاية" المذاع على قناة "أم بي سي مصر": "جاءني من الدكتور ضياء رشوان أنه تم الإفراج عن الدكتور محمد زهران مؤسس تيار استقلال المعلمين".

وأضاف: "إحنا كنا بنقول اللي يدخل الحوار الوطني آمن ودي حاجات بتدي علامات مهمة بتريح؛ الناس جوة الحوار الوطني نفسهم حسوا بإحراج شديد جدا".

وتابع: "إحنا وسط ما إحنا قاعدين الرجل ده اتقبض عليه إحنا مقدرناش نحميه ومقدرناش نديله حماية الرأي؛ الإفراج عن هذا الرجل خبر جميل؛ الرأي ياجماعة بالرأي؛ يارب تقطعه أو تخلص عليه بالرأي وكل اللي أنت عايزه اعمله".

وواصل: "خلاص بقي الناس اللي بتقول رأي ومن حقك تدافع عن كل شيء؛ الخبر ده مريح جدا؛ خبر زي دة بيخليه يحس بالنور أن في نور وأن في حد حكيم خد قرار وقال ياجماعة طلعوا الراجل حاجة تفرح؛ أنا بشكر الناس بتوع الحوار الوطني أكيد حطوا جهد كبير في الموضوع".

وأكمل: "بس عايزين الموضوع برة الحوار الوطني يعني أخوكم لو جراله حاجة وأنا مش في الحوار الوطني مش هتعملولي حاجة يعني؟ في الكام يوم اللي فاتوا دول قالك دة بيشتغل في الأم أي 6 وهربان في بريطانيا وبياخد التعليمات؛ لو على كدة قول اللي انت عايزه".

وكانت قوات الامن قد اعتقلت الدكتور محمد زهران أواخر أغسطس الماضي وفقا لأسرته التي ذكرت أن الاتصال انقطع به منذ أن تم استدعاؤه لمقر الأمن الوطني بالعباسية مساء الثلاثاء الموافق 30 أغسطس.

وأعلنت المبادرة المصرية للحقوق الشخصية، الأربعاء، تعليق مشاركتها بجلسات الحوار الوطني بعد الكشف عن القبض على القيادي النقابي د. محمد زهران، مؤسس الاتحاد الوطني المستقل للمعلمين المصريين وأحد الخبراء المشاركين في جلسات لجنة التعليم بالحوار الوطني.

وقالت المبادرة المصرية إن استعمال تهم سياسية لحبس أحد المشاركين في الحوار الذي دعا له رئيس الجمهورية يعد رسالة تهديد مباشرة لحرية وسلامة المواطنين الذين قبلوا المشاركة وتقديم رؤاهم ومقترحاتهم كخبراء أو كممثلين عن قوى سياسية أو نقابية أو منظمات مدنية.