عمرو أديب: التجار في مصر لا يعرفون إلا رفع الأسعار
علق الإعلامي عمرو أديب؛ على عدم تراجع أسعار السلع الغذائية في مصر على الرغم من انخفاض الأسعار عالميا.
وقال أديب خلال برنامج "الحكاية" المذاع على قناة "أم بي سي مصر": "بقالنا أسبوعين طن الزيت بينزل؛ 10 ألاف نزول في زيت الذرة و5 ألاف جنيه في طن زيت عباد الشمس؛ ليه أزازة الزيت في مصر مبتنزلش؟ التجار في مصر لا يعرفون إلا الارتفاع".
وأضاف: "السلع بتنزل في العالم كله وعندنا إذا مكانتش بتنزل فهي واقفة في مكانها؛ ليه احنا مش زي كل دول العالم أحنا ختمنا أن الأسعار عالية ولكن حاليا الأسعار بنزل".
وتابع: "الزيت قل وكدة ربحك كمان زاد طيب وبعدين؟ هو ايه أصول اللعبة؟ أصول اللعبة لما الأشياء تزيد برة تزيد جوة ولما تنخفض برة بتنخفض جوة؛ وعندنا الأسعار بتنخفض برة ولكن مش بتنخفض جوة؛ الأزازة لم تهتز معقول الطن ينزل 15 ألف جنيه ومفيش مساء الخير 2 جنيه نزلوا دا افترا يعني".
وأوضح: "بيقولوا عندنا بضاعة بالسعر القديم؛ السعر القديم هيخلص أمتي؟ لما السعر العالمي يزيد تاني والا لما الدولار يرفع تاني".
وواصل: "نفس الحكاية في الرز؛ الرز نزل ونفس الحكاية في السكر؛ طيب ايه ياجماعة أمتي؟ في ناس بقي تقولك أيه الدولة بقي ولازم تضرب بيد من حديد ولكن انا بقول التجار أقوى من الدولة؛ الرز دة محلي لية مبينزلش؟ كرتونة البيت اللي عدت الـ 100 جنيه تاني؟ أنا مش هتكلم عن اللحمة دي برة الكلام وهذا أمر خارج عن كل المواثيق وبلاها لحمة".
وذكر: "طيب نتكلم في بقيت الحاجة ليه الأسعار في مصر مبتنزلش؟ دا بالدولار وكانت غالية برفعة الدولار؛ لازم يبقي في كلمة تقيلة بقي مع الناس؛ ماشي فهمت وقدرت وشايفك ومشاكلك طيب والناس؟ الناس زنبها ايه الناس دفعت كتير عشان الغلا ولما السعر ينزل؟ الناس دي مش لازم يتعملها أي حاجة وعلى الأقل أزازة الزيت تبقي زي بتاعة الدولة".
واختتم: "أرجوكم بس يجب أن يكون في حد في السوق مش أنتوا قلتولي عرض وطلب؟ أنا بتاع أليات السوق والسعر العالمي والدولار اللي برة البنك المركزي".
