هرفع عليه قضية.. حورية فرغلي تكشف حقيقة خطوبتها على نزار الفارس
علقت الفنانة حورية فرغلي على أنباء خطبتها من الإعلامي العراقي نزار الفارس، مؤكدة أنها ليس لها أي علاقة بـ نزار كما يدعي، معربة عن غضبها الشديد من تصرفه وإعلانه خطبتهما.
وقالت حورية فرغلي في تصريحات تلفزيونية، إن جميع الصور المنتشرة لها برفقة نزار الفارس كانت من تصوير حلقة في برنامج نزار وليس خطبتهما، موضحة: أنا البرنامج ده بيكلموني من أسبوع وبيقولولي أستاذ نزار عايزك في البرنامج، واتفقنا على يوم الأحد اللي هو امبارح وكان أول مرة أشوفه وفتحتلهم بيتي للمصورين بتوع البرنامج، وأنا في بيتي قاعدة مع مامتي والكلب بتاعي ومفيش حد، هو أول ما دخل قعد يصور وقالي بتحبي ماجد المهندس فأنا قولتله آه طبعا بحبه، قالي طيب تحبي ترقصي على أغنيته؟ ومكنتش عايزة أكسفه وبجامله، ومن ساعة ما دخل بيتي وهو عمال يصور من ورايا ومش فاهمة هو بيصور سيلفي ليه وقولت أسيبه براحته.
وشددت حورية فرغلي أنها لم تتم خطبتها على الإعلامي نزار الفارس، قائلة: أنا متخطبتش لـ نزار ولا لأي راجل في الدنيا وهرفع عليه قضية، لو هو خطبني هو شاف أبويا أمي أخويا؟ خطبني من مين؟، من نفسي ما أهلي عايشين، وأنا زعلانة وقررت دلوقتي إني مش هعمل أي لقاءات مع أي صحافيين ولا إعلاميين، يعني أنا رحبت بيه وكنت تعبانة وعملت معاه اللقاء تعمل معايا كده ليه؟ ليه تخلي كل الناس تكلم أبويا وأخويا يسألوا أنا اتجوزت؟ ليه تعملي مشاكل؟.
