شيرين عبد الوهاب: جابولي الدكتور اللي بيعالج كريستيانو رونالدو

عبرت الفنانة شيرين عبد الوهاب عن سعادتها بالمشاركة في حفل الملحن الراحل محمد الموجي والذي أقيم في المملكة العربية السعودية.

وقالت عبد الوهاب في مقابلة مع برنامج "الحكاية" المذاع على قناة أم بي سي مصر": "أنا سعيدة بالمشاركة في حفل العملاق الأستاذ محمد الموجي؛ بداية نقلة المزيكا من الموسيقي التقيلة شوية إلى الخفيفة مع الفنان عبد الحليم حافظ ومن بعده السيدة نجاة".

وأضافت: "الغناء للمطربين الكبار عبد الحليم حافظ أو نجاة أو أم كلثوم متعة تانية زي الأنسان لما يتجوز ومراته بتعمل أكل حلو أوي لكن لما يروح عند أمه ياكل أكل؛ أنا غنيت أغنتين أنا قلبي ليك مليان للسيدة فائزة أحمد وللصبر حدود للسيدة أم كلثوم".

وتابعت: "أنا لأول مرة بغنيهم وبحب أقدم الأغنية بطريقتي؛ الأغنية دي ملك للجميع واللي يعرف يجيد يتفضل؛ الأغنية هتفضل عظيمة لوحدها وكل واحد بيقولها بطريقته؛ الاغنية أذا اعيدت صياغتها بشكل مختلف الشباب الجديد بيفهم الكلمة؛ الأستاذ حسين الجسمي لما غني أما براوة ملغاش السيدة نجاة ولكن الاغنية نجحت مرتين".

وواصلت: "المستقبل من رب العالمين وأنا بتمنى أن ربنا يرزقني الصحة اللي تخليني أقدر أقدم اللي مقدمتوش السنين اللي فاتت دي أنا طول الوقت بغني وأنا مستمتعة وبكون مستمتعة جدا وسط زمايلي وبقعد أسمع كأني واحدة من الجمهور والفنان ميغيرش لأن كل واحد عنده أدواته".

وأكملت: "تم التصالح مع شركة روتانا والأستاذ سالم الهندي وعدني أن قريب في أربع أغاني نازلين عشان كل موسم نشوف الناس عايزة أيه ونعمله؛ المزيكا زي الفل مفيهاش حاجة ولكن كل واحد بيقتني منها اللي هو عايزه".

وذكرت: "في خلال الـ 15 يوم الجايين دول في حفلة جاية وفي ليلة اسمها إحساس العرب ودي مسؤولية كبيرة وأتمنى أكون قدها ".

وعن سقوطها على المسرح خلال احدى الحفلات قالت عبد الوهاب: "جابولي الدكتور اللي بيعالج كريستيانو رونالدو وعملي علاج طبيعي؛ أنا بقالي 3 أيام بعمل علاج طبيعي وبيربطلي رجلي بحاجات طويلة كدة وريحتني جدا وبشكرهم أنهم اهتموا برجلي زي مارادونا عشان أنا عندي ماتش".