13 متهما صينيا.. أحمد موسى يكشف تفاصيل واقعة نصب "هوج بول"
كشف الإعلامي أحمد موسى؛ تفاصيل واقعة النصب التي قام بها مؤسسي منصة "هوج بول" مشيرا إلى أن عدد الضحايا وصل إلى نصف مليون.
وقال موسى خلال برنامج "على مسؤوليتي" المذاع على قناة "صدى البلد": "المستريح أنت بتروحله وأنت عارفه ولكن انت هنا بتكلم على ايه؟ تليفون؛ أنت رحت بنفسك محدش قالك روح وبعد كده ألحقونا يا جماعة أتسرقنا؛ مين النهاردة بيدي مكسب 400%"
وأضاف: "أنت رايح المكتب دة عشان تحول فلوسك بإرادتك محدش ضربك على أيدك؛ العصابة فيها 13 واحد صيني؛ وزارة الداخلية مسكت مشكورة على كل أعضاء العصابة؛ الولاد واقفين بيحولوا الفلوس بتحول لمين؟ حد كلمك؟ عارف انت بتبعت لمين؟".
وتابع: "ايه اللي عارفه؟ أنت اتعملت منصة الكترونية والحقوا ياجماعة تعالوا استثمروا وتعالوا اشتروا مش عارف أله والأله أرباحها اللي بألف واللي بألفين عشان تشتغل في العملات الرقمية؛ طيب ما ده مجرم والبنك المركزي من سنة وأكتر طلع قرار بتجريم الكلام دة".
وأكمل: "أنت متأكد أنه عملية نصب؛ هو في ناس لحد النهاردة لسة بيضحك عليها؟ والمستريح واللي الناس بتروح واللي في أسوان؛ الداخلية أتكلمت على 19-20 مليون تقريبا؛ عدد الضحايا اللي اتعرضوا للنصب أكتر من نصف مليون؛ هل الناس دي عندها وضع قانوني لا؛ هل أنت واثق فيهم؟ لا".
وأوضح: "بتتعامل مع وسيلة نصب الكترونية ولكن اللي بتكلم عليه الطمع؛ استسهال تحقيق مكاسب وأرباح سريعة؛ دي بتكون النهاية يقولك تعالي أشغلك في التعدين تعدين ايه اللي هيشغلك فيه؛ قالك تشتري أله بـ200 تخدهم تاني يوم بـ400 والـ8 ألاف تخدهم 140 ألف منين؟ دا لو بتشتغل في الهروين؛ تاجر المخدرات مبيكسبش المكاسب دي".
وواصل: "هترجعلك فلوسك ازاي؟ طيب أنت النهاردة استغثت وجريت والحقوني هو أنت لما رحت حد قالك روح؟ أنت رحت لوحدك؛ ناس واقفة طوابير دا في عائلات راحت باعت اللي وراها واللي قدامها عشان تكسب قالك اللي عايز أغير شقتي واللي عايز يتجوز وفي النهاية اية؟ مش موجود".
واختتم: "معظم اللي اتنصب عليهم في هذه المنصة متعلمين؛ دي كارثة والمصيبة أنهم متعلمين والمصيبة أنه ناس واحد بيستغني فجأة عن 100 ألف جنيه أو 300 ألف جنيه؛ هي فلوسك جاية ازاي مش تعبان فيها؟ أنت عشان تكسب كام يعني؟".
