تامر أمين يفتح النار على إدارة الكرة المصرية: "دخلنا في مرحلة الانهيار"
أكد الإعلامي تامر أمين؛ أن كرة القدم المصرية دخلت في مرحلة الانهيار التام، مشيرا إلى أن المستوى العام للعبة في مصر تراجع بشكل كبير.
وقال أمين خلال برنامج "أخر النهار" المذاع على قناة "النهار": "الحقيقة حسبي الله ونعم الوكيل في كل اللي سايب كرة القدم في مصر تصل لمرحلة الانهيار؛ الأسبوع اللي فات تحديدا في كرة القدم كان أسبوعا كاشفا عن سواد كرة القدم المصرية وانهيار كرة القدم المصرية".
وأضاف: "منتخب مصر للشباب اللي مصر بتنظيم كأس الأمم الأفريقية للشباب ويلا وشدوا العزم يارجالة وهاتوها؛ فضيحة ورا فضيحة ورا فضيحة بجلاجل أخر ماتش".
وتابع: "أول ماتش اتعادلت مع منتخب موزمبيق المتواضع وبردو مش عارف تجيب جول ثم هزيمة من نيجيريا واحد صفر ثم بقي الفضيحة اللي بجلاجل اللي هو الماتش اللي قلت لا الروح رجعت وهنشد ونرجع ونكسب؛ السنغال عملت حفلة في استاد القاهرة واكتفت برباعية نظيفة وطلعتنا برة البطولة بنقطة حتى معرفناش نطلع تالت المجموعة عشان ننافس ضمن أحسن توالت".
وأكمل: "خسرنا تنظيم البطولة وخسرنا الفوز ببطولة الأمم الأفريقية وخسرنا التأهل لكأس العالم؛ خسرنا لأنه لا نستحق أن نلعب وخسرنا لأن ده مش منتخب وخسرنا لأن ده مش جهاز فني".
وأوضح: "مين الكابتن محمود جابر؟ ايه تاريخه التدريبي عشان يتولى هذه المهمة الكبيرة؟ المدير الفني لمنتخب مصر للناشئين اللي بيصنع منتخب مصر اللي هيستلم الراية السنوات اللي جاية؛ أيه إنجازاته أيه السي في بتاعه أيه اللي قدمه عشان نقول هو دة اللي يمسك براعم مصر وأمل مصر وكرة قدم مصر اللي جاية؛ ولا حاجة".
وأكمل: "قلتلكم على الفساد اللي حصل والدكتور جمال محمد علي مدير إدارة المنتخبات باتحاد الكرة بيقولك أحنا مش عارفين أساسا جه ازاي؟ طيب أنت سايبه بقالك سنة ونص ليه وانت عارف أنك داخل على كأس أمم أفريقية أنت اللي بتنظمها يا اتحاد كرة وعارف أنه غير مستوفي للمعايير اللي أنت حاططها ومع ذلك سايبه لحد ما المصيبة تحصل وبعدين يقلك ملناش دعوة".
وأوضح: "أنتوال أمتى هتلعبوا بينا الكرة؟ أنا زعلان والشارع الرياضي المصري في أسوأ حالاته من الإحباط؛ هي دي مصر في كرة القدم؟ زعيمة أفريقيا وصاحبة السبع بطولات أفريقيا بقينا نعاني عشان نلعب بس مع الأفارقة؟ عشان مفيش تخطيط عشان مفيش علم عشان مفيش إدارة وفي عكسهم كله".
واختتم: "ايه دة؟ الريحة زكمت الأنوف وأنا بوجه كلامي لوزارة الشباب والرياضة وللجنة الأوليمبية؛ هو أنتوا أدواركم مش اصلاح الرياضة وتطوير الرياضة ازاي سايبين قطاع كرة القدم في مصر ينهار كل يوم وانتوا واقفين مكانكم كدة؟".
