بعد الخروج المهين لمنتخب الشباب.. خيري رمضان يوجه رسالة نارية لوزير الرياضة
وجه الإعلامي خيري رمضان، رسالة إلى اتحاد الكرة المصري ووزير الشباب والرياضة عقب الخروج المهين من الدور التمهيدي لبطولة الأمم الأفريقية للشباب والمقامة في مصر.
وقال رمضان خلال برنامج "حديث القاهرة" المذاع على قناة "القاهرة والناس": "نسأل السيد وزير الشباب والرياضة والا رئيس اتحاد الكرة؛ نقولهم إن منتخب الشباب اللي بيلعب في مصر واللي مصر قررت تستضيف بطولة الأمم الأفريقية عشان نقدم دعم لهؤلاء الشباب اللي بيلعبوا ناشئين في فرقهم وفرق كبيرة".
وأضاف: "دول هيبقوا نواة منتخب مصر؛ اتعادلوا مع موزمبيق واتغلبوا من نيجيريا واتغلبوا مع السنغال 4 – صفر؛ هل كنا متوقعين؟ نعم كنا متوقعين؛ حد فيكم يعرف عن البطولة دي قد ايه؟ اتحاد الكرة ياتري اهتم بهذه البطولة وعمل لجنة إعلامية وتواصل مع وسائل الاعلام وعملنا حشد للناس عشان تروح المدرجات؟".
وتابع: "سألنا الكابتن محمود جابر هل هو المدير الفني المناسب؟ السيد وزير الشباب والرياضة قال اللي كان بيحصل قبل كدة مش هيحصل وسندقق في الاختيارات؛ طيب مين المسؤول عن تدقيق الاختيارات السابقة مين اختار المدرب وعلى أساس ايه؟ في لايحة على فكرة بتحط المواصفات بتقولك إن يكون المدرب حسن السير والسلوك وأن يكون له تاريخ وهو لاعب كرة وأن يكون له تاريخ في التدريب وأن يكون حاصلا على البطولات".
وواصل: "هل ياتري كنا نعرف الكابتن محمود جابر درب كام فريق وخد كام بطولة وحاصل على مؤهلات ايه عشان يدرب منتخب الشباب طيب ليه طلبتوا البطولة تبقي عندنا ونتغلب بالاربعة وبالواحد ومنحققش ولا فوز؛ داحنا مجبناش ولا جول".
وأكمل: "تصدقوا فرقة بتلعب تلات مباريات؛ ومجابتش ولا جول؛ أه اللي هيتفرج عليهم هيكتشف عبث العيال يا حبيبي معندهمش خطة لا في خط وسط ولا لعب على الاجناب ولا في أي حاجة؛ عيال بسكويت غلابة معندهمش روح ولا أحنا كنا نعرف عشان نبث الروح".
وأوضح: "احنا فوجئنا بالبطولة يلا في بطولة؛ بطولة بجماهير قليلة بعرض افتتاحي متواضع لا يليق بنا؛ أخطاء اتحاد الكرة زادت ويتحمل المسؤولية؛ أخطاء السيد وزير الشباب والرياضة يتحمل المسؤولية لأنه وافق أن البطولة تكون على أرضك لازم يكون عندك استعداد كويس".
وذكر: "لازم الشباب يا سيادة الوزير اللي موجودين والجهود العظيمة في مراكز الشباب كنا نجمع الشباب ويحضروا المباريات وكنا نتابع المدرب عشان نشوفه بيعمل ايه؛ لكن للأسف خرجنا من البطولة اللي لسه هتنتهي في 11 مارس؛ للأسف بقت بطولة ماسخة".
واختتم: "هذا هو مستقبل الكرة المصرية علينا أن نلتفت لمستقبل الكرة المصرية عشان يبقي عندنا منتخب كويس وبهذا الشكل منتخب السنغال اللي جاي جامدين أوي ومش هنقدر نصارعهم لما نبقى الصغيرين دول بتوعنا الغلابة دول هما الكبار اللي جايين اللي لم يجدوا أي اهتمام ولعبوا ماتشين وديين هفأ".
