أنغام تكشف أصعب لحظة خلال وعكتها الصحية: "بطني اتفتحت واتركبلي خرطوم"

كشفت الفنانة أنغام؛ تطورات حالتها الصحية بعد تعرضها إلى وعكة صحية نقلت على إثرها إلى المستشفى لإجراء جراحة.

وقالت أنغام في مداخلة هاتفية مع برنامج "كلمة أخيرة" المذاع على قناة "أون": "أنا بخير الحمد لله وبتحسن كتير يوميا في تحسن؛ عمر ابني كان بيبات معايا يوميا وأمي وأخواتي وأصحابي كانوا حواليا وكل زمايلي وأصدقائي".

وأضافت: "في ناس كانت بتيجي كل يوم ويتحايلوا مين هيبات معايا النهاردة؛ دعا الناس كان ليه الأثر الكبير والناس اللي كانت بتصليلي في الكنايس والأمهات اللي كانت بتسأل عليا والقلوب الحلوة دي وطبعا الأطباء الدكاترة الكبار المحترمين وطاقم التمريض بشكرهم كلهم".

وتابعت: "أصعب لحظة مرت عليا كان اللحظة اللي فيها كان في دكتور بيقول لازم نفتح بطنها ونعمل استكشاف ودكتور تاني كان بيقول لا؛ أنا بطني اتفتحت واستأصلنا الرحم؛ وأنا أتركبلي خرطوم من مناخيري للأمعاء والمفروض أنه يسلك الأمعاء".

وأوضحت: "كان في لحظة في أخر يوم؛ اليوم السابع بالخراطيم كنت أنا ابتديت أعيط ونفسيتي نزلت الأرض واليوم دة في حاجة حصلت من عند ربنا والحمد لله شالوا الخرطوم واللي قبله الناس كانت بتقول عندها التهابات في المعدة وأنا بطني بتنتفخ والأكل مبيعديش وبق الماية مبيعديش".

وأكملت: "في لحطة كدة كنت بخاف أنام؛ خايفة أروح في النوم لـ متنفسش؛ لأن النفس كان رايح عندي خالص؛ الدكتور ماجد الشناوي أحسن دكتور أنف وأذن وحنجرة علمني أنه لو هضطر أحط أنابيب في زوري لأي عملية يبقي لازم تكون للأطفال أصغر أنابيب".

وواصلت: "تعاملوا معايا بالبنج النصفي وشلت الرحم ودخلت في المشكلة الأكبر؛ وهما بيحصلولي الخرطوم خدروني ومع ذلك وأنا في التخدير كنت بقول صوتي بس الحمد لله الخرطوم دة مش بيعدي من الحنجرة خالص".

وذكرت: "بعد ما دخلت المستشفى ومنعوا الأكل والشرب عني؛ كنت فاكرة أن الادراك يقل وأبتديت أتوه شوية والتوهة دي كانت فيها كوابيس؛ الصحة رزق كبير من ربنا وأهم حاجة للبني أدم وحب الناس".

واختتمت: "حفل الكويت هتتعمل يوم 26 ديسمبر والبرنامج الحمد لله كنا مسجلين عدد حلقات تكفينا لأخر الشهر وأنا مصورة عدد كويس".