مصطفى بكري يطالب بالتحقيق في وقائع فساد: لو أنا غلطان حاسبوني

طالب الإعلامي مصطفى بكري؛ بالتحقيق في وقائع الفساد التي طرحها حول تطوير مصانع شركة مصر للغزل والنسيج والاتهامات بوجود فساد إداري لوزير قطاع الأعمال السابق هشام توفيق مشيرا إلى أنه على استعداد لتحمل المسؤولية حال كانت الاتهامات التي أطلقها غير صحيحة.

وقال بكري خلال برنامج "حقائق وأسرار" المذاع على قناة "صدى البلد": "هكشف لكم الأيام الجاية ازاي مملكة الصحاب والأصدقاء دخلت مصانعنا وخربت وتأمرت وفرطت أصل دي حاجات ميتسكتش عليها دي بلدنا ومصانعنا ودا يخلينا نشك في كل اجراء خلال الفترة اللي فاتت؛ وانتوا بتعرضوا تقارير على رئيس الوزراء لازم تتراجع حتة حتة ونعرف حصل أيه وازاي".

وأضاف: "الجهات المعنية سواء كانت رقابية أو النيابة العامة ياريت تتفتح الملفات دي ولو أنا غلطان خدوني وحققوا معايا إنما متسيبوش الملفات بهذا الشكل مفيش حد يرتكب هذا الكم من الفظائع ويروح ينام في بيتهم؛ النهاردة القرض اللي كان 22 مليار ارتفع إلى 30 مليار بسبب فرق العملة وأنتوا مجبتوش المكن في معاده".

وتابع: "أنتوا بتقولوا تصريحات وتضحكوا علينا لا قيادة سياسية ولا رقابية هتسمح بده ولا إعلام؛ أحنا نتكشف معلومات وبنقول يا بلد بصي حواليكي".

وأوضح: "وزير قطاع الأعمال السابق أول ما طلع كتب مقال في جريدة الشروق وقال إيه لزمة المشروعات القومية دي؟ وبقي والقطاع العام خرب البلد وقعد يشكر في جده الخديوي إسماعيل وبيقول العسكر ميقولش أبدا القوات المسلحة دا ازاي استمر؟ سؤال لرئيس مجلس الوزراء دا ازاي استمر الفترة دي كلها؟".

وأكمل: "في ناس بتبقي موجودة وأنا اتكلمت عن مملكة الصحاب والأصدقاء وكشفت أمبارح ازاي رئيس شركة قابضة بياخد 5 مليون ونص مكافأت مع أن القانون ميديش أكتر من 600 ألف وماسك رئيس مجلس إدارة وعضو منتدب وهو الوحيد اللي مسموح ليه بكده".

واختتم: "ليه ياخد 5.5 مليون مكأفأت؟ ليه يجمع بين دي ودي وأحنا مش هنسكت ونقول لصانع القرار السياسي أدي الواقع لو احنا كدابين أو بنضحك على أي حد تعالوا وحاسبونا ولو أحنا صادقين أعتقد أن الأجهزة الرقابية مبتسكتش على أي حاجة".