الخميس 28 مارس 2024 الموافق 18 رمضان 1445
رئيس التحرير
شيماء جلال
عاجل
أخبار

عمرو أديب عن ارتفاع الأسعار: "فيه ناس عايزة تمص دمنا وتخرم المركب"

الإعلامي عمرو أديب
الإعلامي عمرو أديب

علق الإعلامي عمرو أديب؛ على الارتفاع غير المبرر لأسعار السلع في الأسواق، مشيرا إلى أنه يستغرب ذلك رغم ثبات سعر الدولار مقابل الجنيه.

وقال أديب برنامج "الحكاية" المذاع على قناة "أم بي سي مصر": "السنة الجاية في حاجة اتكلمنا عنها من أربع خمس شهور وهي الركود التضخمي؛ الركود أن السلع مبتتباعش والتضخم أن الأسعار غالية غالبا دول زي بعض والسنة الجاية هيعيشوا سو سوا".

وأضاف: "أنا عندي سؤال مش فاهمة ومعنديش ليه إجابة؛ عندنا بدأ تعويم الجنيه وتوقف عند 24.5 جنيه للدولار والسلع زادت حتى 24.5 سؤالي اللي مش لاقيله إجابة لماذا يستمر زيادة الأسعار؟ إحنا واقفين 24 ونص وبنشوف زيادات الـ 25 -26 ليه مش فاهم؛ نتحدث عن العلف يزيد والأرز يزيد والبيض يزيد في الأول كنت عارفك وشايفك أه الدولار والزيادة؛ دلوقت لماذا تزيد أسعار السلع بشكل مستمر وإحنا بنتكلم عن معدل تضخم شكله كدة 20%".

وتابع: "إيه هي الآليات اللي في السوق اللي بتودي إلى زيادة الفول والعدس أنت قلتلي أنا أحسب على سعر الدولار دة؛ رفعت أسعارك؟ لماذا يستمر الارتفاع واحنا كدة دخلنا في اللامعقول أنا بقولك السلع هترطرط واللي بيجرا في السوق دة هيبوظ السلع أكتر وأكتر".

وأكمل: "الناس انكوت بغلاء الأسعار؛ ولما اجي أجبلك أن دولة زي بريطانيا ناس بقت تاكل وجبة واحدة ويقللوا؛ مش بيزود السعر ولكن بيقلل الكمية ويعمل فرق الأسعار والناس كلها عايشة في مأساة الأسعار".

وأوضح: "عندك شعب صابر وبيستحمل والناس بقت تستلف والناس اللي بتشتغل شغلانة بقوا اتنين متدوسش أكتر من كدة؛ الناس اللي في بطاقة التموين دول في رقبة الدولة وأنا اتحدث عن الطبقة المتوسطة أيوة هناك توافر إلى حد 90% من السلع وفي بعض السلع بيتلعب فيها شوية".

وأكمل: "واضح جدا أن ارتفاع الأسعار أقوى من التشريع قلت مفيش رز غير بـ 15 ممشيش الحال وقلت مفيش رز إلا بـ 15.5 ممشيش الحال ومفيش رز إلا بـ 16.5 ممشيش الحال وقلت مفيش رز إلا بـ 18 وبردو الحال إيه مش قد كدة".

وواصل: "دا معناه أيه؟ أن اللي معاه السوق أقوى من الدولة وودايما كدة؛ أنا لا أتحدث عن المواطن اللي بياخد رز وزيت التموين هذا له حكومة تحميه أنا أتحدث عن الناس اللي بتنزل تشتري وتعمل السوق".

وذكر: "لماذا يستمر ارتفاع أسعار أي شيء؛ أدخل مطعم وكل فاتورة الأسبوع اللي فات غير الأسبوع ده؛ الفول والطعمية والجبنة البيضاء واللبن؛ في ناس تقولك بردو ياجماعة التوافر؛ السلع موجودة واحنا بندخل سواء قطاع حكومي أو خاص؛ غالبية السلع موجودة".

واختتم: "السوق المصري فيه كل التنوع ولكن بكام؟ ولماذا تزيد احنا مش عايزين نوصل لمرحلة السلع موجودة ومحدش بيشتريها تكلم دة يقولك أصل دة؛ طيب وبعدين هي ملهاش سقف؟ ملهاش نهاية؟ في ناس عايزة تمص دمنا وتخرم المركب عن عمد".