إبراهيم عيسى: نصف الشعب المصري فقير ميغركش زايد والتجمع والساحل الشمالي

أكد الإعلامي إبراهيم عيسى أن البنك المركزي كان يرفع سعر الفائدة حتى يوقف التضخم؛ مشيرا إلى أن زيادة الفائدة يستهدف أن يضع المواطن أمواله في البنك لتقليل السيولة بدلا من شراء السلع.

وقال عيسى خلال برنامج "حديث القاهرة" المذاع على قناة "القاهرة والناس": "اقتصاديين كانوا بيقولو دا مش حل لأن مش فكرة الناس معاها فلوس فهتروح تشتري فالحق حط فلوسها في البنك؛ الناس معاش فلوس أصلا؛ الكلام دة يجوز على برة على أمريكا فترفع سعر الفائدة وتقلل السيولة في السوق".

وأضاف: "أنت عندك مشكلة تانية خالص في مصر؛ الناس مش لاقية تشتري ترفع لها فايدة أيه هما معاهم فلوس أصلا؟ أنا بتكلم على اللي بيشتري عربية أو جهاز تليفون أو جهاز بنته؛ الناس مبتشتريش لأن الأسعار غالية".

وتابع: "النظرية دي كسبت مع البنك المركزي وقالوا معندناش أزمة أن في سيولة وشرا كبير فاحنا عايزين نقلل التضخم فخلينا زي ما احنا في الفايدة خصوصا أن الزيادة في الفايدة بتزيد على القروض والدولة أكبر مدين من البنوك تقريبا".

وأكمل: "الدولة بتستلف من ودائع البنوك فبتاخد بفايدة أكبر؛ البنك المركزي قرر يحلها بطريقة تانية؛ عن طريق أن يجبر المقرضين أن جزء من الفلوس يفضل موجود في البنك".

وأوضح: "نصف الشعب المصري فقير طبعا؛ اللي فوق خط الفقر بعشرة جنيه فقير طبعا خصوصا أن طريقة الحساب طريقة مصرية لطيفة؛ بنحسبها وكأن المعيار العالمي ينطبق علينا واقع مصر صعب جدا".

واختتم: "ميغركش زايد والتجمع والساحل الشمالي؛ اللي يمشي في التجمع ويدخل مول في زايد والا يروح الساحل ميحسبش أن دي مصر؛ دي مش مصر دي طبقة مستورة إلى مرفهة وأكبر نسبة ممكن تكون 5% من المصريين".