عن الزعيم ونيللي كريم وطارق لطفي.. أبرز تصريحات باسم سمرة مع عمرو الليثي في "واحد من الناس"
حل الفنان باسم سمرة ضيفا على برنامج "واحد من الناس" الذي يقدمه الإعلامي د.عمرو الليثي عبر شاشة قناة "الحياة"، وتحدث سمرة خلال الحلقة عن حياته الخاصة لأول مره، كما تطرق للحديث عن الكثير من الأسرار بحياته وخلال مسيرته الفنية، وأدلى سمرة بعدة تصريحات مثيرة للجدل حول أدواره وعلاقته بعدد من نجوم الوسط الفني.
أبرز تصريحات باسم سمرة
جاءت تصريحات باسم سمرة كالتالي :
- كان نفسي أعمل دور زعيم الاسماعيليين الحشاشين "حسن الصباح " فى مسلسل لكن هيقدم الدور كريم عبد العزيز و أنا بتمنى له التوفيق و سيقدم الدور بالتأكيد بشكل رائع
- قدمت عمل مع الأستاذ يسرى نصر الله بعنوان "بعد الموقعة" و كنت صاحب الفكرة و مسئول عن الخيالة
- كان نفسي فى عمل تاريخى لكن دلوقتى بقى صعب بسبب إرتفاع تكلفة الأعمال التاريخية
- أحب الخيول و ركوبها و أقتني فى مزرعتي العديد من الخيول العربية والأوروبية
- لا أتاجر في الخيول والفنان مصطفى شعبان عنده خيول وبيتاجر فيها
- أحب الحيوانات بصفة عامة وأعشق الزراعه وأمارسها وأهدي انتاجي لأصدقائي وجيراني وأقاربي
- لم أكن فى البداية مرشح لدور "فتحى الريان" و كان هيقدم الشخصية الفنان طارق لطفى
- تواصلت مع طارق لطفي قبل تقديم الدور وقال لي : "دور كويس جداً ومتقدم بشكل مميز وبالفعل كان فاتحة خير عليا
- أنا زوج عملي ومش رومانسي خالص وبحب أحافظ على البيت وبحب كل حاجة تبقى مترتبة وبتوقيتات
- قبل ما أتجوز كنت راجل مقطع السمكة وديلها بس دلوقتي لا عشان خلاص كبرنا وبقى عندنا عرايس
- أنا صاحب الكلمة في البيت مش عشان الذكورية ولا حاجة بس بما أن أنا أكتر خبرة وحريص على بيتي وبحب بيتي جدا فالمركب اللي ليها ريسين بتغرق
- في إحدى المرات معجبة جات قالتلي عايزة اتجوزك قولتلها كلمي مراتي لو وافقت أنا تمام
- كان نفسي يبقى عندي ولد بس جاتلي تجربة كانت قاسية جدا عملنا محاولة والبنت توفت بعد شهرين من الولادة فأثرت فيا جدا فحمدت ربنا على اللي عندي
- زوجتي من خارج الوسط الفني وبناتي لديهم هوايات مختلفة
- بناتي بيحبوا الحيوانات جدا والخيل والزراعة والرسم والرحلات، بس للأسف هو الجيل دا خرجنا من ثورة دخلنا في كورونا على أوكرانيا، ربنا يكون في عونهم الجيل دا، يعني أنا عامل لهم اشتراك في النادي مرحوش غير بتاع عشر مرات
- بحاول إن بناتي يكون عندهم رأيهم، ومش هجوزهم، هقعدهم معايا (أنا مش مودرن) أنا لو شايف الحاجة صح هعملها
- عمري ما اتضربت من أبويا لأنه كان بيحبني جدا.
- لا أتذكر أنني قبلت أي عمل فني أو سينمائي لمجرد احتياجي للأموال، وفخور بكل شغلي ولو مغلتطش مش هعرف أصحح من نفسي
- عندما ينتقد الجمهور دور قمت به في أي عمل سينمائي لا أهتم
- قدمت فيلم عمارة يعقوبيان وشخصية "عسكري أمن مركزي" وكان دور جريء جدًا
- هذا الفيلم لي ولخالد الصاوي سبب شهرتنا رغم أن الدور كان محل انتقاد ومش أي حد يعمل دور زي ده
- لا بد أن يكون هناك شخصية قوية لمواجهة الناس بعد موجات النقد اللاذعة
- مقلقتش من الدور خالص، معايا عادل إمام وأقلق، دا كان مصر كلها في الفيلم وكمان الأستاذ نور الشريف
- كان نفسي أعمل دور ابن البواب اللي عمله محمد إمام، والاثنين كانوا بطولة موازية العسكري وابن البواب
- الفنان القدير عادل إمام أشاد بدوري إشاده عظيمة في هذا الفيلم
- مسلسل "ذات" كان رواية لـ صنع الله إبراهيم، وهي رواية رائعة وبدأت العمل مع المخرجة كاملة ابو ذكري وهي مخرجة مبدعة ولكنها لم تكمل العمل
- أكمل المسلسل المخرج الكبير خيري بشارة وكنت محظوظ بالتعامل معهم
- نيللي كريم كانت لسه في بدايتها وكانت فاكرة اننا من عالم آخر وماكنتش عارفه تقول كلمتين على بعض
- نيللي تطورت وتقدمت بشكل كبير واصبحت نجمة كبيرة
- أحب كرة القدم وأتابع ليفربول لحبي لمحمد صلاح
- أنا أهلاوي ولكن الكرة بقى فيها عنف وتعصب بين الجمهور، الكرة في مصر أصبحت مختلفة
- قدمت فيلم "أحاسيس" وحقق نجاح وكان به عدد كبير من القبلات ولكني لم أقم بهذا الامر
