محمد الباز: مصر تمتلك 3 نقاط أساسية لإنهاء أزمة سد النهضة
أكد الإعلامي محمد الباز؛ أن مصر قادرة على إنهاء أزمة
سد النهضة الإثيوبي مشيرا إلى أن الدولة تمتلك القدرات والإمكانيات على ذلك.
وقال الباز خلال برنامج "أخر النهار" المذاع
على قناة "النهار": "من شهور واحنا مبنسمعش حاجة عن سد النهضة ومع
ذلك الدولة المصرية تدير الملف كما قررت بحكمة وانضباط شديد وبمسؤولية ومن امبارح
وفي كلام وزارة الخارجية طلعت بيان؛ وايه اللي خلي مصر تعود مرة أخرى للتأكيد على
ثوابتها في أزمة سد النهضة وثوابت مصر أن إثيوبيا تنفرد بقرارها في قواعد ملء
وتشغيل السد".
وأضاف: "يوم 26 يوليو أحنا بنتكلم من 3-4 أيام
إثيوبيا بعتت جواب رسمي لمصر وقالت يا جماعة احنا مستمرين في بناء السد وهنا
إثيوبيا بتحتج بهذه الخطابات أنها بتقوم بالتنسيق واتفاق إعلان المبادئ بيقول إن
مفيش أي طرف من الأطراف التلاتة ينفرد بقرار يخص سد النهضة".
وتابع: "إثيوبيا بتبعت جواب لمصر وللسودان وكأن
إثيوبيا بتبري زمتها وتقول أنا أخبرت مصر والسودان؛ أنت بتخبر بشيء مش واخد
الموافقة عليه أصلا".
وواصل: "مصر بعتت خطاب إلى مجلس الأمن ايه اللي
هيختلف يعني؟ أنت قلت في الجواب أن مصر بترفض التصرف اللي بتقول بيه إثيوبيا وأنها
مصرة على أن تسلك الطريق القديم؛ مجلس الأمن طلع بيان رئاسي يلزم الأطراف التلاتة
بالعودة إلى مائدة المفاوضات الجادة".
وأكمل: "مصر بتقول لمجلس الأمن أنتوا طلعتوا بيان
وفي دولة مارقة خارجة عن الإطار وإنه لازم تلزموا الدولة دي بالعودة إلى مفاوضات
جادة؛ أي مواطن قاعد بيقول ليه مطولين بالنا أوي ومبناخدش اجراء واضح جدا خاصة أن
مصر لديها 3 نقاط ارتكاز أساسية يمكن أن تنهي أزمة سد النهضة".
وأوضح: "أول حاجة عندك قدرة عسكرية كبيرة تستطيع من
خلالها أن تجري ضربة عسكرية لهذا السد ودا حقك لأن في خطر على الأمن القومي؛ عندنا
قوة عسكرية وتسليح متنوع وتدريب".
وأردف: "تاني حاجة عندك الحق القانوني؛ أنت بتدافع
عن حقك القانوني سواء في اتفاقيات زمان أو اتفاقية إعلان المبادئ اللي بتقول محدش
ياخد اجراء منفرد".
واختتم: "الحاجة التالتة والمهمة أن عندك دعم شعبي؛
إذا نزلت النهاردة تعمل استفتاء أن مصر تعمل ضربة عسكرية للسد هتلاقي أكثر من 90%
تؤيد هذا القرار؛ لكن ليه مبنعملش دة لأن في سياسة النفس الطويل وأن مصر مش دولة
عدوان وأنك عايز تدعم وتشجع أي دولة على التنمية مش أنك تعمل حرب معاها".
