" دي خرابة ولو منه أرجع في نفس الطيارة".. عمرو أديب يعلق على إقالة إيهاب جلال على الهواء

علق الإعلامي عمرو أديب؛ على قرار اتحاد الكرة إقالة المدير الفني للفريق الوطني دون إبلاغه وذلك خلال سفره مع المنتخب لإداء مباراة ودية مع كوريا الجنوبية.

وقال أديب خلال برنامج "الحكاية" المذاع على قناة "أم بي سي مصر": "دي خرابة هو في حاجة كدة؟ يا جماعة كرة القدم دي تخطيط وعلم؛ في إيه؟ الناس النهاردة إيه مشينا إيهاب جلال طيب وبعدين مشيتوا كام مدرب قبليه".

وأضاف: "في الأخر يقولك أصل اللاعيب عندنا مبيعرفش يسلم ويستلم؛ وبعدين يرجعوا يقولوا مانجيب حسام حسن وبعدين هو احنا بندور على مدرب قاعد على القهوة".

وتابع: "قالك أصل حازم متخانق مش عايز يقعد مع رئيس الاتحاد؛ أنا مكنتش فاهم إيه اللي حاصل؛ حالة من حالات سدة النفس؛ اللاعيبة متخانقين مع المدرب".

وواصل: "وبعدين تقول أصل المدرب المصري مبيملاش عين اللاعيبة؛ أمال الجوهري كان مين؟ وحسن شحاته كان مين؛ دا الجوهري دا كان يبص بس وحسن شحاته دة ميملاش عين؟".

وأكمل: "أنت جايبه وعارف أنه ميملاش عين؟ وكل مرة زي ما قلت امبارح ياعم استني بس الظروف ياعم أديلوا الفرصة طيب أحنا مشي علينا كام فرصة؟".

وواصل: "الراجل المدرب دة شكله إيه قدام لاعيبته لما ينزل من الطيارة؛ يقولوله مش رئيس اتحاد الكورة قال إنه هيمشيك؟ طيب أنا كمدرب اللاعيبة هتقف قدامك ازاي؟ ياعم دانت ماشي خلاص".

وأوضح: "هو انتوا بتتفقوا مع رجالة والا إية؟ في اتفاق وفي سمعة لاتحاد الكورة المصري؟ زي موضوع الجواب بتاع الأهلي دة حاجة ما أنزل الله بها من سلطان".

واختتم: "الراجل ينزل من الطيارة يقولوله معلش يا كابتن أصل قالوا حضرتك يمشي؛ والله أنا لو منه أنا أستني في البتاع وأركب وأرجع تاني؛ والله ما أشتغلها؛ لو أنا؛ أنا ما اشتغلها خالص".