لميس الحديدي بعد تعافيها من الإصابة بأوميكرون: "اللي حماني التطعيم"
طالبت الإعلامية لميس الحديدي؛ بتدخل الدولة
من أجل تقليل الكثافات في الوزارات والمصالح الحكومية مع ارتفاع معدلات الإصابات
بالمتحور أوميكرون.
وقالت الحديدي خلال برنامج "كلمة أخيرة"
المذاع على قناة "أون": "أنا شايفة كل حاجة زحمة المواصلات زحمة
والقهاوي زحمة والمولات زحمة ومع كل الانتشار اللي بنشوفه مبنشوفش كمامات خالص
والناس اعتبرت الأوميكرون أنه دور برد خفيف
وأضافت: "لما نشوف الانتشار المفروض
نشوف زيادة في التطعيم؛ تطعيم الأطفال فوق سن 12 سنة مش أكتر من 300 ألف هنواجه
الموجة ازاي؟ لا بنطعم ولا بنلبس كمامات؛ أنا اللي حماني بعد ربنا ودعا أمي وناس
كتيرة هو التطعيم؛ أنا مطعمة 3 جرعات".
وتابعت: "أنا من أول الناس اللي خدت
الساينوفارم ثم جونسون؛ إذا كنت مطعمة 3 مرات وتعبت كدة وماذا عن غير المطعمين؟
أرجوكم هو مش دور برد خفيف وأنا مشفتوش دور برد خفيف إذا كانت لديك أعراض في ناس
تقولك أنا مجلتيش حرارة مش لازم يجيلك حرارة ولو عندك أعراض أعزل نفسك لحد ما
تتأكد عشان متعديش أسرتك".
وأكملت: "محتاجين نشوف طريقة لتقليل
الكثافات الموجودة دلوقت؛ ونرجع للكمامة لازم ترجع إجبارية تاني؛ العالم سابقنا
والناس 80% مطعمين أما أحنا لسة ورا لازم نشوف طريقة لموضوع الشيشة ونحن في فترة
ذروة وأرجو من الأهالي أرجوكم طعموا ولادكم قبل ما تطلبوا أن المدارس تقفل طعموا
ولادكم".
واختتمت: "عايزين نقلل الكثافات بشكل لا
يعطل العمل لا عايزة أقفل مرور ولا شهر عقاري والرئيس طلب دة بوضوح وكل وزارة تطلع
تقولنا احنا قللنا الكثافات ازاي؛ المشهد بتاع القهاوي والمولات لا علاقة له بناس
عندها كورونا".
