بعد انتحار موظف التجمع.. أزمة جديدة لمديرة العلاقات العامة بالقرية الفرعونية بعد فصلها تعسفيًا
تصدرت رندا الشيخ، منصات مواقع التواصل، عقب فصلها من القرية الفرعونية، حيث قالت في منشور استغاثة لها علي الفيس بوك:" بمناسبة انتحار موظف شركة التجمع الخامس.. تخيلوا إن مدير القرية الفرعونية قرر فصلي تعسفي بعد خدمتي للقرية ٦ سنين كمديرة العلاقات العامة والاعلام بالقرية وكنت دايما بحاول اظهر مجهود القرية إعلاميا فالصحافة والقنوات واعمل كل الأفكار اللي ممكن تساعد الدولة في تنشيط السياحة اخرها فكرة الزفاف الفرعوني وعمري ما قصرت يوم فشغلي وربنا وحده يعلم وبعد كل ده قرر، مجدي الزيات مدير عام القرية الفرعونية بفصلي عشان أشادت باحتفالية طريق الكباش، آه والله زي ما بقولكم كدا، أنتم عارفين أد إيه أنا بحب شغلي في القرية الفرعونية، ولما بشوف أى حاجة سياحية بتتعمل في مصر، بجري عشان نعمل زيها عندنا فى القرية، وده اللي حصل بعد ما شوفت احتفالية طريق الكباش المبهرة بحضور الرئيس السيسي، وزيي زي أى حد كان منبهر، علقت على منشور كاتبه أحد أقارب ملاك القرية اللى عايشين فى أمريكا اللى كان بيشيد فيه بالاحتفالية ومبسوط بيها جدا، فكتبت ياريت نعمل زيها عندنا عشان نشجع السياحة المصرية رغم إن القرية منشأة خاصة، فالراجل كتب وقال ما معناه ياريت طبعا بس عشان هو عارف حاجات احنا منعرفهاش انتقد مدير القرية، فأنا طبعا ماليش دعوة باللي بيحصل، المهم شغلى وبس".
أضافت خلال منشورها :" بعدها بكام يوم فوجئت بمدير القرية بيقولي تعالى عايزك وبيقولي ازاي تعلقى وتكتبي كدا، رغم إن كتبت إشادة عادية جدا كلنا كتبنا زيها على صفحتنا بعد الحفل، وبيبلغني إنه عايزني أمضى على استقالة، وبعدين فهمت إنه كان عايزني أرد على كلام الراجل اللى اتهمه بالفساد واشتمه وقالي المفروض كنتي هزأتيه وانا متربتش علي كدة ، ، وبدلا ما ياخد حقه بالقانون او يرد هو عايزني أنا اللى أرد عليه. مكنتش مصدقة نفسي من الصدمة وقومت دخلت مكتبي اعيط ازاي عايزني اسيب مكان شغلي اللي بحبه وكنت بحلم دايما أكبره واستحملت فيه كتير من ظلم الإدارة ونفسنه وحقد وكره اني أكون شاطرة او اعمل اَي فكرة تعجب أصحاب القرية ف امريكا واستحملت خصم ٣٠٪ من مرتبي وكنت ف فترة الحمل اثناء كرونا وبعد عودتي للعمل لقيته بيبلغني انه اخد كل رصيد إجازاتي خلال ٦ سنين فترة عملي وكمان عمولتي اللي كانت بمبلغ كل ده وساكتة عشان بحب شغلي يجي هو يقولي امشي مش عايزينك ولو مش عاجبك امشي قانوني.
طبعت تانى يوم قررت أروح شغلى عادي وأشوف حصل إيه، لقيت نازل قرار بمنعى من الدخول، ومنعني اخد حاجتي اللي ف مكتبي واخدو كل الداتا اللي تعبت في تجميعها سنين وساعتها قررت أخد حقى بالقانون، عملت محضر ٧٩٢١ إدارى بتاريخ ١/١٢/٢٠٢١، بقسم الجيزة ثم روحت مكتب القوى العاملة وقدمت شكوى ضد مدير القرية حملت رقم ١٦٢ بتاريخ ١/١٢/٢٠٢١، بتهمه فيه بالفصل التعسفي، وطبعا القضية خلاص راحت محكمة، ومش هسيب حقي وهاخدة بالقانون.".
واختتمت :" ازاي يقرر مدير يقطع عيش موظف ويسببله الاذي النفسي والمادي ده . انا حرفيا مش بنام وبدعي ربنا يجبلي حقي منه الاحساس بالظلم وحش اوي بس ربنا كبير واسمه الحكم العدل وهيجي اليوم اللي ربنا يرد فيه المظالم . فإذا دعتك قدرتك علي ظلم الناس تذكر قدرة الله عليك".
