تامر أمين عن أداء الأهلي أمام الإسماعيلي: "الله أكبر في عين العدو"

علق الإعلامي تامر أمين؛ على فوز الأهلي على الإسماعيلي بأربعة أهداف دون رد في الجول الأولى من مسابقة الدوري الممتاز لكرة القدم.

وقال أمين خلال برنامج "أخر النهار" المذاع على قناة "النهار": "امبارح كنت بكلمكم عن المقدمات لمباراة الأهلي والإسماعيلي وقلت أن التشكيل غريب وفيه مفاجأة وبيلعب من غير الشحات وطاهر وكهرباء وبيلعب من غير رأس حربة صريح والتشكيل يبدو عجيب".

وأضاف: "قلتلكم اللي بيفهم كورة شوية أوعوا يحكم على التشكيل من الورق أنا سمعت لما روحت بقي الفطاحل بتوع التحليل الرياضي اللي قال لا مش عارف إيه واللي قال دا عايز يلعب بشادو سترايكر عشان يخطف هدف واللي قال دا بيلعب بتلاتة ديفندر وخايف من الإسماعيلي".

وتابع: "الكورة هي تطبيق اللاعبين للي بيقوله المدرب في الملعب مش تشكيل على السبورة أوعي حد يحكم بدري نتفرج وبعد كدة نحكم وأديكو شوفتوا امبارح".

وأكمل: "الأداء الله أكبر في عين العدو في أداء عظيم وفي تحركات وفي مفاجأة للخصم والإسماعيلي في أول نص ساعة مكانش فاهم إيه اللي بيحصل".

واختتم: "الإسماعيلي فرقة كبيرة ولاعيبتها كبار وبسبب المفاجأة والخداع اللي الأهلي عمله مكانش فاهم مين بيعمل ايه وعلى ما فاق وفهم كانت النتيجة 3 صفر والماتش خلص الكورة والتحليل مش بدل وكرفاتات".