عمرو أديب عن التعديل الوزاري: "لازم يكون في الجول"
أكد الإعلامي عمرو أديب، أن التعديل الوزاري المتوقع حدوثه خلال الفترة المقبلة يجب أن يستهدف الوزارات التي تحدث فارقًا في حياة المواطن، مشيرًا إلى أن هناك بعض القطاعات التي تحتاج إلى التعامل بشدة وجرأة.
التعديل الوزاري
وقال أديب، خلال برنامج "الحكاية" المذاع على قناة "إم بي سي مصر": "موضوع التعديل الوزاري أرجو أن يكون في الجول في الحاجات اللي تحدث فرقًا، في مجالات محتاجة تبقى شديدة وتبقى تغيير، وجرأة، أرجو التعديل الوزاري أو التغيير الوزاري اللي متوقعينه الأسبوع الجاي أو اللي وراه".
وأضاف: "أنا عايز أعرف ليه السرية اللي مفروضة على التعديل الوزاري، هو جرى إيه أو مفيش تعديل وزارة، إحنا مبسوطين وعايزين الوزراء دول يكملوا إيه المشكلة، دائمًا هناك سر، وآه نقعد بقى مع الناس اللي بتقولك مش عارف، وزير المالية الدكتور محمد معيط ماله وحاجات كده".
وتابع أديب: "أي دولة بره بيقولوا ياجماعة إحنا بنعمل تعديل وزارة الفترة اللي جاية، بما إنك عزمت فتوكل على الله هتغير؟، خلال هتغير أين مجلس النواب من كل هذه الأشياء؟، اتكلموا يا جماعة دي مش شغلتي خالص، مثلًا الـ12 طيارة اللي هيتباعوا بتوع مصر للطيران هيتباعوا ليه؟".
تحديثات كثيرة
وواصل: "في مجلس نواب يجيب المسؤول يقوله إنت اشتريت الطيارة دي من 4 سنين هتبيعها دلوقت ليه؟، مين اشتراهم؟، واشتريتوهم على أساس إيه؟ ولا في سبب تاني؟، الدور الأساسي لمجلس النواب يقوله لو سمحت تعالى هاتلي ورقك".
وأكمل: "قالك الموضوع أثار غضب النواب طيب حصل إيه؟، ماشي، وبعدين حط ده في أي دولة كده، وشوف النواب هيعملوا إيه، وطبعًا زي أي حاجة في مصر طلع الموضوع أوي وبعدين الناس نسيت وخلاص".
واختتم: "هذا بلد تحدياته كتير، وفي حق إحنا قاعدين في دائرة من النار والنيران قاعدين في منطقة ما يعلم بيها اللي ربنا، الموقع الجغرافي ده بندفع تمنه من دمنا وعرقنا وفلوسنا وكل حاجة، يجب دائمًا التفسير والشرح طول ما المركب ماشية، وإلا الناس هتفضل تقولك أنت رايح فين؟، لازم الناس تفهم، الوحيد اللي عنده الصلاحية إن الناس تفهم هو مجلس النواب".
