"بنحافظ على الصناديق".. أحمد موسى يوضح سبب عدم قطع الكهرباء أيام الانتخابات
![الإعلامي أحمد موسى]( /UploadCache/libfiles/18/9/600x338o/573.jpg)
علق الإعلامي أحمد موسى؛ على عودة انقطاع التيار الكهربائي لتخفيف الأحمال بعد انتهاء الانتخابات الرئاسية والتي أقيمت على مدار الأيام الثلاثة الماضية.
وقال موسى خلال برنامج "على مسؤوليتي" المذاع على قناة "صدى البلد": "قالك يعني احنا بنفرج وتلاقي الكهرباء الساعة 11 الصبح تقطع خلصنا انتخابات أيوه ملهاش علاقة يا جماعة".
وأضاف: "موضوع الكهرباء هشرحهولكم براحة الكهرباء من يوم الجمعة مكانش في قطع كهرباء ليه؟ لأن في لجان انتخابية وقضاة وصناديق انتخابات ولجان وناس بتروح وفرز وغيره وضمان أن محدش يشكك ويقولك شوفتوا قطعوا الكهرباء عشان يغيروا الصناديق".
وتابع: "كان لازم الكهرباء تبقى موجودة ملهاش علاقة بحاجة تانية؛ الكهرباء من يوم الجمعة لحد النهاردة صباحا مقطعتش عشان اللجان الانتخابية؛ الصناديق بنحافظ على الصناديق واللجان شغالة والفرز شغال طيب الناس هتروح اللجان ازاي والفرز هيتم ازاي؟ لو قلت نزل 40 مليون محدش هيصدقك ويقولك الكهرباء قاطعة مخصوص".
وواصل: "الكهرباء رجعت النهاردة للقطع لمدة ساعتين في اليوم إلى حين اشعار أخر؛ لقيت النهاردة الصبح الناس بعتالي شوفت الكهرباء قاطعة كأن أنا اللي ماسك مفتاح الكهرباء مانا قلتلكم ياجماعة مفيش قطع للكهرباء لحد يوم الأربعاء هو أنا وزير الكهرباء والا وزير البترول".
وأوضح: "مش أنا السبب في قطع الكهرباء وليس لها ارتباط بنزول الانتخابات أو غيره ولكن لها ارتباط بعدم حدوث مشكلة ولا حد يقولك قطعوا الكهرباء عشان يغيروا صناديق ولا أنت محتاج لده؛ على مدى تلات أيام العالم كله والاعلام الدولي بيتكلم؛ تخيل أول مرة الاعلام كله لا يجد ثغرة يتكلم فيها عن الانتخابات المصرية".
وكانت الحكومة قد توقفت عن تخفيف أحمال الكهرباء في كل أنحاء الجمهورية بداية من الجمعة الماضية وتزامنا مع بدء التصويت في الانتخابات الرئاسية.
وفور انتهاء الانتخابات الرئاسية عادت الحكومة إلى تخفيف الاحمال المستمر منذ الصيف الماضي بسبب تراجع كمية الغاز الطبيعي التي يتم ضخها في محطات توليد الكهرباء.
ولم تحدد الحكومة موعد انتهاء تخفيف الأحمال موضحة أن الامر مرتبط بتحسن الوضع الاقتصادي وبالتالي زيادة كمية الوقود في محطات توليد الكهرباء.