الباز يرد على فبركة الإخوان تصريحاته بشأن الأزمة الاقتصادية
رد الإعلامي محمد الباز؛ على ما نسبته إليه شبكة رصد الإخوانية حول إرجاع أسباب الأزمة الاقتصادية إلى الشعب المصري وافتقاده سلوك إدارة الأزمة.
وقال الباز خلال برنامج "أخر النهار" المذاع على قناة "النهار": "من أول يوم ظهرت في برامج التوك شوك كنت بطلع ضيف في برامج كتير وأنا أعلن بشكل واحد أني أنتمي إلى 30 يونيو ومؤيد بشكل واضح جدا لنظام 30 يونيو وللرئيس عبد الفتاح السيسي".
وأضاف: "هذا الانتماء والانحياز عشان أبقي واضح مع الناس اللي بتسمعي ومينفعش أعمل نفسي محايد وأن أنا بعرض الحقائق مجردة وبعدين ألعب لعبة التضليل وأخدك إلى جهة معينة وفي الاخر أقولك أنا محايد".
وتابع: "أنا منحاز إلى 30 يونيو وفكرة 30 يونيو؛ هذا الانتماء والاعلان الصريح بالمناسبة؛ لأن في ناس بتكلم وكأن على راسها بطحة ومتكلمش عن إنجازات الدولة المصرية؛ أنا لما ببقي مقتنع بفكرة بأدافع عنها بشراسة؛ ليه بقول هذا الكلام عشان أأكد أن اللي بيقوموا بتشويه الدولة المصرية ناس مضللين وكاذبين".
وأوضح: "امبارح قلت لحضراتكم أنا مش ههاجم الحكومة لصالح الشعب ومش ههاجم الشعب لصالح الحكومة ببيساطة شديدة مبدأنا في أخر النهار أن لو لقيت حاجة كويسة بقول عليها كويسة لقيت حاجة مش كويسة بقول عليها حاجة مش كويسة".
وواصل: "شبكة رصد الاخوانية لما خدت هذا التصريح اخدته ازاي؟ لأن التصريح الواضح اللي حضرتك سمعته لما نشروه قالوا ايه؟ قالك سبب الازمة الاقتصادية هو افتقاد الشعب لسلوك إدارة الأزمات ولن اهاجم الحكومة لصالح الشعب".
وأكمل: "انت لما تقرا هذا الكلام وتكون مسمعتش اللي انا قلتله طبيعي وحلال عليك أي وصف ليا؛ ليه؟ لأن هذا ليس عمل اعلامي أن واحد يطلع يقولك أنا مش ههاجم الحكومة لصالح الشعب".
وذكر: "أنا قلت مش ههاجم الحكومة لصالح الشعب ومش ههاجم الشعب لصالح الحكومة؛ احنا بنرصد ما يحدث على الأرض ولكن بيجي الاعلام الاخواني وتدخل رصد وبعدين اللجان الالكترونية لأنه عايز يوصلك رسالة أن الشخص دة بتاع النظام وبيقول مش ههاجم الحكومة لصالح الشعب".
واختتم: "ما الذي تنتظره من اخواني كذوب؟ هتستني ايه؟ هل توقفت أمام هذا الكلام انتصارا لنفسي؟ احنا بقالنا سنين بنقول يخبطوا دماغهم في الحيط ولكن أنا بوصل رسالة أنه هذا الإعلامي لما يقولك حاجة لازم تتأكد أنه لا يقول الحقيقة".
