إلهام شاهين عن دور منى زكي في «أصحاب ولا أعز»: «لو اتعرض علي هقبله»

أكدت الفنانة إلهام شاهين؛ أن دور منى زكي في فيلم أصحاب ولا أعز يعد أنضج دور قامت به في حياتها الفنية، موضحة أن الدور لو عرض عليها كانت ستقبله.

وقالت شاهين في مداخلة هاتفية لبرنامج "آخر النهار" المذاع على قناة "النهار" والذي يقدمه الإعلامي تامر أمين: "أنا بفكر بمنطق فني؛ ومتقدرش تقول هو الراجل المصري بيعمل كدة أو اللبناني بيعمل كدة؛ مش كل الناس بتتصرف بنفس الشكل".

وأضافت: "بيحصل في مجتمعاتنا العربية بعض الأمور الموجودة على الفيلم؛ في ستات بتكلم ناس متعرفهاش ورجالة بتعمل أسوأ من اللي في الفيلم".

وتابعت موجهة حديثها لمقدم البرنامج: "الفن لا يقيم أبدأ من منطق أخلاقي؛ منى زكي معملتش حاجة غلط وأنا أرفض تقييمك للدور من منطلق أخلاقي" ليرد أمين: "انتي دلوقت تعديتي حرية الإبداع ورفضتي رأيي؛ أنا قلت إن الفيلم أقل من مستوى منى".

وأوضحت: "نتفلكس يوميا يطرح أفلام جديدة والناس اللي اتكلموا عن الفيلم عملوله دعاية وهيكون الأكبر مشاهدة في تاريخ نتفلكس".

واختتمت: "الفيلم ده أتعمل إيطالي ومكسيكي وملوش بلد؛ أنا بحيي صناع الفيلم ودة كان مباراة في التمثيل وبرافو على كل الممثلين والمخرج أكثر من رائع".