"ممر شرفي وهدايا وبانر".. أحمد رمضان طالب صيدلة يتصدر التريند
تصدرت كلية صيدلة جامعة الزقازيق تريند السوشيال ميديا بعدما قامت الدفعة الخامسة من الكلية بعمل ممر شرفي للطالب أحمد رمضان تقديرا لجهوده مع زملائه في الدفعة.
وتصدر هاشتاج "شكرا احمد رمضان" تريند تويتر، وكتب أحمد مجدي أحد الطلاب: "دفعة كاملة عملت ممر شرفي لطالب زميلهم شايف كم الحب ده لأن ده ما شاء الله عليه من الطلبة المتفوقة عمره ما تخلى عن حد فينا بيساعدنا في حياتنا الدراسية وأي مشكلة تواجهنا بيعمل مجهود رهيب علشان يقف جنبنا وينجحنا يعمل ريكوردات مفهمتش هينزلك ويشرحلك ده اسمه أحمد رمضان".
وقالت طالبة في تغريدة أخرى: "أول يوم ليا في الكلية كنت تايهة أنا وصاحبتي ومش عارفين نروح فين دكتور رمضان قابلنا وعرفنا على الكلية وحقيقي الكلية هتكسب شخص زي دا كمعيد والدفعات الجاية كلها ربنا يباركله ويجعله في ميزان حسناته".
وقالت أسماء طالبة أخرى: "يستاهل أكتر من كده والله ومفيش أي حاجة توفيه حقه حقيقي، ربنا يوفقه في حياته ويسهل عليه كل صعب بحق ما سهل علينا ووقف جمبنا وساعدنا وكان بيتفنن إزاي يوصلنا المعلومة ويبسط الدنيا علينا".
وقام الطلاب بعمل بنر كبير في الجامعة تكريما له قالوا فيه: "سلاما وحبا لمن يعطون المعروف دون انتظار شكر وكانوا في الشدة عون وفي الرخاء رفاق أجمل عبارات الشكر والثناء لن توفيك حقك فكنت لنا نعم الزميل والأخ والصديق".
